Projekt Gutenberg

Textsuche bei Gutenberg-DE:
Autoren A-Z: A | B | C | D | E | F | G | H | I | J | K | L | M | N | O | P | Q | R | S | T | U | V | W | X | Y | Z | Alle
Gutenberg > Klaus Groth >

Quickborn

Klaus Groth: Quickborn - Kapitel 57
Quellenangabe
typepoem
booktitleQuickborn
authorKlaus Groth
year1930
publisherF. W. Hendel Verlag
addressMeersburg und Leipzig
titleQuickborn
sendergerd.bouillon@t-online.de
firstpub1853
Schließen

Navigation:

Ut de ol Krönk

(Müllenhoff, Sagen, Märchen und Lieder etc. S. 11, 14, 22)

Ditmerschen dat schölen Buren sin?
It mögen wohl wesen Heren.
Neocorus I, 521.

1.
Graf Rudolf von Bökelnborg
(1145)

    »Kamt rop Herr Graf von Bökelnborg, de Buern kamt mit Korn!
»Kamt rop min Graf un freit dat Hart un seht mal mit vun Thorn!

»De Buern wullen Herren sin, dat is se slech bekam'!
»Nu treckt se her as Oss un Swin mit Halter un mit Klabn.«

Fru Walborg seet in siden Kleed, un Krüsen um de Back,
De Buern keem dær Dreck un Lehm all mit en Klabn um Nack.

Se keem' to Wagen een bi een mit grote Säck vull Korn,
De Graf mit samt sin stolte Fru de keken dal vun Thorn. –

Kamt raf Herr Graf, slut op de Port, kamt raf un nehmt de Schuld!
De Bur is kam in Ked un Klabn un hett betalen wullt.

Do lach he in sin grisen Bart, do lach se in de Tähn,
Do stunn' se op in all er Staat, de Ossen antosehn.

Do de'n se wit de Porten op vær Wagen un vær Per,
Do keemn se rin, en lange Reeg: de letzte sparr de Dær.

De sparr de Port un reep so lud: De Bur is doch keen Slav!
Nu röhrt de Hann' un sniet de Bann' un stekt de Bökelgraf!

Do warn se beid as Krid so witt un as de kalkte Wand,
Do sprung ut jede Wetensack en Kerl, en Mess in Hand.

Un nu Herr Graf man raf in Drav: Wi bringt den Martinssold!
De Bur is kam in Ked un Klabn, un  d e  betalt sin Schuld.

 << Kapitel 56  Kapitel 58 >> 






TOP
Die Homepage wurde aktualisiert. Jetzt aufrufen.
Hinweis nicht mehr anzeigen.